行蚺蛇尖行到發燒

今日20071210病左無返工，全因為尋日夾硬去左行蚺蛇尖。
兩個體拜前Amanda已經同佢d朋友約好左尋日20071209去行蚺蛇尖。大家都有晒心理準備蚺蛇尖係比較難行。我同Amanda都特登去左買對行山鞋，準備挑戰蚺蛇尖。
尋日朝早6點幾起身，感覺沾寒沾凍，心想仆街啦，今日至黎唔舒服！我覺得我之所以會唔舒服係因為前日食得太多炸野，由其是我討厭既KFC！
心想反正都準備好晒，可能去到會精神d啦。於是就同Amanda出發。先到鑽石山集合，坐車入黃石再坐船到高流灣起點。
鑽石山等96R巴士既人好多，於是唯有同其他人分批入黃石。
搖左一個鐘頭巴士入到黃石，感覺沒有變好或轉差。



當時在想，我依家咁既狀態行蚺蛇尖會唔會出事架？累倒其他人就唔好啦！但心裡又真係好想行，所以都係先搭船入去高流灣再睇情況。去到高流灣都係無咩好轉，Amanda講得啱，都未聽過吹下海風病會好既！即使係咁，我都決定左要一齊上蚺蛇尖。
沿路的風景都好靚，可惜天氣唔係咁好，望唔到好遠。行程中有好多地方既草木都有人咁高，我地都要係草木叢中穿插。




遠望蚺蛇尖，越來越近啦！























一路上小小既山岥起伏我都應付得到，但因為感覺越來越唔舒服，也感覺越來越吃力。終於去到蚺蛇尖山腳，我作出了一個為自己好也為大家好的決定，忍痛放棄。我同Amanda沿山腰去蚺蛇尖既另一面山腰，而其他同伴繼續上蚺蛇尖經山頂再落到另一面既山腰同我地會合。
我同Amanda離開左大隊之後，沿著山腰既小路走，行下行下入左個陰森樹林，地上有些泥沼，好得人驚。最驚既係聽到有手機震動的聲音，唔係我既又唔係Amanda既，咁係邊道黎既呢？！其實最怕係見到d II。我們再行左一陣，竟然又返返去剛才行過既地方！後來碰到三個男仔Paul, Edwin同唔記得左咩名既第三個人，因為佢地都係去果邊，於是一齊行。
頂佢，果條路越行越唔對路，如果要去蚺蛇尖另一面既山腰，要經過旁邊的一個山頂，大大話話都有蚺蛇尖三份二既高度，小！大佬，我都已經投左降，比條路細佬我行下好唔好？
同時間又接到電話，大隊那邊也放棄左上蚺蛇尖，決定行高d既另一條山腰小路去會合點，再小！原因是有隊員隻鞋爛左，而且受到另一班行山人士既影響，所以放棄。唉，希望我既放棄唔係佢地既考慮因素之一啦，唔想累左佢地。
我同Amanda終於去到蚺蛇尖旁邊的另一個山頂，Amanda都還ok輕鬆，而我因為唔舒服，真係出晒力至上到去。學梁榮忠話齋，我真係感覺到有死亡既感覺！同時間，再接到電話，大隊已經到左會合點啦！再再小！
之後既都係下岥路，ok啦。途中影低我今次行程既遺憾。




之後順利同大隊會合，當時大約三點幾，大家才正在食午餐。休息完，再經過一段起伏的石屎路到達一個馬頭。我地就係坐呢隻船返去黃石。


其實沿途我都幾精神，但因為唔舒服，體力真係下降左好多，而且有幾次行行下失左平衡感覺，如果真係要上蚺蛇尖都幾危險。
後黎搭巴士出番去鑽石山，d燒至慢慢發出黎，到左荷里活廣場我真係頂唔順，拿拿聲截架的士返屋企。
嚮屋企沖完個熱水涼，沖既時候舒服，但沖完都仲係沾寒沾凍，真係唔掂，唯有又要揸架車出去睇醫生。
醫生話有d燒，例牌都係多飲水多休息。我當然支持要多休息啦！即刻問醫生攞張星期一既假紙抖下先！