你要呀嗎？我比你～

尋日同Amanda去左Jusco買隻細鑊，諗住用黎煎少少野可以省d火省d油。排隊比錢既時候見倒後面個land仔攞住一大盒Transformer玩具，我果時無望佢個樣都知佢應該好開心啦。但係聽倒佢老豆同佢講，「買左返去唔準玩住家」係訓示既語氣。吓？！我心諗唔通係送比其他細路嘅？「咁幾時至玩得呀？！」個細路都好似我咁唔多明佢老豆想點。「要等月中daddy去泰國入貨，媽咪唔得閒培你既時候至俾開黎玩」。我望一望個land仔個樣超爆笑，果種面容扭曲，個樣完全將小朋友的內心反映左出黎，有咩理由買左番去又唔俾拆黎玩？真係不知所謂。係唔係因為減價所以買左先？定係條land仔太煩買左比佢先塞住佢把口？
今個星期人大常委話香港係2017年可以普選行政長官，2020年可以普選立法會。2020年我都44歲啦，心諗總好過無，總算有個時間表；不過好多人都未必等得倒個日。試諗吓仲有12年，陳太都要80歲啦！
不過原來最嘔血既係，阿爺既普選同我地講既普選未必係一樣家播。阿爺既普選係可以保留功能組別既立法會議席…咁普條毛咩！
『如果民主派仲要堅持2012普選或者爭論普選既模式，咁即是香港未有共識啦，咁就會連2017普選行政長官都趕唔切落實。咁就係民主派阻礙民主進程，係佢地衰囉～』又黎一招大石宅死蟹。煲軚就好啦，叫做完成左承諾，爭取倒普選時間表，完成左使命。但責任就落左係香港能否有共識，民主派肯唔肯妥協上面，呢個波交得快又準！Orz
『你要呀嗎？我比你～但係唔比你玩住，條規矩係我度，等我高興先啦！』