漫長嘅普選路，到底你同我有無機會等到？

半個月前人大講左話香港2017可以普選特首2020可以普選立法會。但係尋日就依然有2萬幾人為左2012雙普選再次上街，表達出佢地對人大嘅方案嘅不滿。喺蘋果度搵倒張漫畫，好正。
















我無去，因為我去左蚺蛇尖復卓。
原來連黎智英都有去，佢對人大提出嘅2017普選特首建議做左個比喻「就好似俾隻碗你，但入面無飯嘅，然後又叫你接左佢喎，咁樣連乞兒都唔會接啦！」「冇飯你都叫我食，係侮辱緊我地。」佢強調並非反對中央提出普選時間表，只是時間表之外，卻欠缺實質內容。又真係無錯，之前我都有提過，中央都當我地班香港人低B嘅，求求其其扔個時間表出黎，所謂2017，佢可以設好高嘅門檻，2020可以有功能組別，咁點算係民主普選？
尋日無去真係「side」左，遊行由一班爭取民主多年嘅民主老戰士帶頭，睇蘋果仲話隊伍中有好多已經上左年紀嘅市民。當中有曾經出席87年9月，由民主政制促進聯委會（民促會）發起在維園舉行嘅爭取「八八直選」集會，果時有超過一萬個市民參加，聲勢也十分浩大。大哥，咁耐之前？我都仲未上中學喔！87年果時六四都仲未發生。我覺得佢超利害，成廿年，由港英政府到依家回歸左足足廿年，係俾政府耍左廿年，但係仲未死心，勁！不過都係果句，哩班人有生之年都唔知有無幾會親自去選特首。

















另外一個正嘅地方係大會將北京奧運歌改左歌詞變左《2012 We Are Ready》。我都好想要番份歌詞。喺蘋果度睇倒哩張相，d參加者舉起V字手勢唱緊《2012 We Are Ready》，仲以為連警察都支持一齊唱，唔知邊個警察咁夠雷。小，原來佢第起五隻手攔住遊行隊伍，真係俾佢吹到啤一聲又好笑。








無錯，就算中央提出左d咩方案做左d咩決定，我覺得都係要繼續堅持2012雙普選！哩個係姿態，係我地香港人嘅願望，係素求。唔可以俾佢地以為我地已經收貨，佢哩d咁嘅方案只係可以用黎氹細路，呃唔倒我地！依家個社會變得咁快，地區同國家都一直喺度好快咁轉變，我地要先表達出自己嘅意見，等萬一時機來臨嘅時候，就可以依據民意去改革，如果到果時至出聲，你想講都無得講！另外即使2012雙普選真係無法落實，也不要讓中央繼續提出一d有陷阱嘅方案，迫使佢地令2017同2020普選更加貼近香港人嘅意願。
來源蘋果日報