我槽肥左隻熊

上個星期二美國減息，果晚就已經決定左要同談左兩個月戀愛嘅聯想(992)一刀兩斷，一於襯佢反彈賣鬼左佢。星期三朝早返到公司，終於搵倒個時間上下網望下個市，恆指升番7百幾點，升番穿22000，當時仲諗緊應唔應該放。望一望佢個價，小~升番果的咁多，拿拿聲放左佢算啦，無眼屎乾淨盲。同佢一齊兩個月，足足花左我兩三成積蓄，都怪我無好好咁止蝕，但我話比自己聽依家大家分開下都唔遲。大家冷靜一下，將來可能有復合嘅機會呢。
d人話個市最近落入左一個大跌小回嘅格局，見倒恆指因為美國減息反彈，仲唔係一個千載難逢可以為「熊仔打肥仔針」嘅機會？因為喺公司，行動一定要快！所以好快咁搵左隻瘦曼曼嘅熊仔(收回價22400)，落左order至算。今次買得比第一次多，但也算少。
之後再望一望，嘩~嚇死！恆指升到上差唔多22200，差200點隻熊仔就要打靶，好彩最後都落番21866收市。收市前橫睇掂睇果晚都應該無咩特別消息令美股連升兩日，21900距離22400仲有斷唔長唔短嘅路，而且有過第一次嘅經驗，所以博一博佢反彈完星期四會跌，我同自己講會有7至8成把握！今次一定可以槽肥佢！
第二朝一開市~YEAH！~恆指即跌700點！我隻瘦熊一下子暴肥左一倍有多！最後喺恆指剛跌穿左21000嘅時候把肥熊賣掉，賺左140%！Percentage黎講好似好大，但係其實唔係買左好多，賺左果d都唔夠cover 992輸嘅三分一。Hmm…千萬唔可以有咁嘅心態，賺少少已經好滿足啦，牛熊窩輪哩d野話無就無，話變牆紙就變牆紙，買得大輸得大呀！要時時警惕自己至得！