我細個好「度」

啱啱過左果個禮拜六係老豆舊曆牛一，一家人出左去酒樓食飯。唔記得講開d咩，阿媽話我細個嘅時候好慳，「阿達去大家樂食晏連可樂都唔要架，剩係飲水。都係叫d平嘅飯…粟米肉粒飯…」我都係第一次聽阿媽咁樣形容我。之後仲好笑，「家姐細個就真係敗家，去麥當勞又要奶色又要可樂…」哈哈哈…原來阿媽都咁記住哩d野，成二三十年前嘅哩d小數目都記得咁清楚。比阿媽話敗家，雖然係講笑笑住講，但係都唔知家姐會有d咩感受。飲多杯奶色就敗家…哈哈。
其實我都記得我細個好唔捨得洗錢，特別係老豆老母嘅錢。記得有一次初中冬天買左件七百幾蚊嘅外套，七百幾蚊嚄！果時係我有生以來買嘅最貴一件衫！返到屋企唔開心左一排，因為有d內疚買左件咁貴嘅衫。哈哈…求學時期嘅小康之家係咁窮架啦。後來果件外套我著到大學畢業出黎做左幾年野之後至捨得扔掉，哈哈，咁多年乜都抵番啦！
大個之後諗返轉頭，都真係唔駛咁慳，果時真係過份地慳，慳到一個地步可能會有人覺得「做咩野哩個細路咁『度』家？！」。