潛水兩個月~

離上次出post有兩個幾月，哩兩個月晚晚做功課，皆因衰過至知要惡補~
由今年三月開始玩牛熊，雖然一開頭係有d斬獲，正所謂輸錢皆因贏錢起，直至到7月底累積蝕左45k。雖然唔係多...但係都係時候比自己冷靜一下，再唔調整一下玩法，輸爆廠都只可能係聽日既事...
先係買左曾淵滄果本《戰勝貪婪與恐懼》，哩本簡直係大市既心靈雞湯~新手固然之可以從中吸取前人經驗，損過手既就更加係感同身受。睇完可以令自己既眼光擴闊，舒緩心裡面既壓力。之後再喺其他書、同網頁惡補一下基本既知識，雖然好多野之前都已經睇過，有d認識。之不過人就係咁，到你衰過至知要用功~
依家晚晚做功課，記錄番d指數期貨情況、拆息、匯價等等既資料，用黎做d圖表分析實習一下。
總括之前點解輸~？主要係自己喺熊市盲目咁搏反彈，喺熊市搏反彈已經係高危，仲要無根無據咁搏，同扔錢落屎坑無乜分別，確實唔係我哩d唔可以貼市跟蹤既人所玩既玩意。最金果次隻牛比人回收左，輸15k。
另一隻魔鬼就係喺自己心裡面，往往唔可以嚴守止蝕。隻牛熊跌穿左自己定既止蝕位都唔願走人，差唔多跌到落收回價都仲一相情願佢會彈...癡線~！HSI啱啱穿收回價幾點，食左隻牛熊都係常見既事~！
仲有就係貪心得黎又太短視，今日HSI升，走左一轉牛賺40格，聽日HSI繼續升，又心思思高追，用更高價入番同一隻牛，咁係咪白癡！卒之就咁就蟹左，坐艇出左大西洋...最後就索性等俾人回收，引刀成一快...超級老散所為...
要記住番工既時候睇唔倒個市，即日鮮絕對唔啱我玩~！
不嬲都有喺d forum同d ching吹水，雖然大部份既ching都係吹水9 up居多，但係都有少數有point既人。曾經有個ching比倒我一d啟發，最搞笑既係佢出現左一兩日就消失左~希望唔係輸到甩轆上左IFC啦~哈哈~
有個舊同學鍾意玩窩輪，話搵d末日輪扑中就發達~我都信當牛市既時候買call/牛係可以發達，但係佢就比較進取，會借錢/孖展買，哩個就超出左我既底線喇~9月頭佢打電話問我借幾皮野周轉...唔通佢要補倉？希望佢平安度過~
依家主要靠睇圖，等牛熊信號出現，再入貨渣佢幾日至一兩個禮拜，如果次次可以食佢一二百格都幾和味，依家個市大上大落，如果可以睇更長而自己又可以更堅持既話，其實番一番都係平常事~只要嚴守止蝕，隻牛熊唔比人回收，留得青山在，那怕無錢贏~
上面講既其實都係d老掉牙既points，人人都識講，但係當自己第一身要做決定既時候，往往都係由疑不決，敗給貪婪與恐懼...
雖然依家好想盡快將輸左果d賺番返黎，但係要說服自己唔好太急太衝動，一來依家仲係自己重整之後既實戰實習期，二來要堅持熊市只用三分一既cash去玩，如果搏反彈更加只可以用六分一既cash去搏。逐d逐d追返啦~！熊市最緊要保本~下次牛市至大舉出擊~！
自從潛水，自我調整，搵倒一個適合自己玩既方式之後，已經追番一半之前輸果d，慢慢黎啦~次次都賺果個係神人，最緊要自己沉得住氣，總有返埋岸既一日既~